पुस १२ एजेन्सी।।सामान्यतया ७ वर्षका बालबालिकाले के गर्छन् होला ? यो प्रश्न सुन्नासाथ हाम्रो मनमा अनेक उत्तरहरु आउँछन् । ७ वर्षका बालबालिका गुडियासँग खेल्न रुचाउँछन्, आमाबुबासँग घुम्न रुचाउँछन् । जे होस् सानै भएकाले उनीहरु अभिभावकको निगरानीमा हुन्छन् । तर केही बालबालिका भने सानैदेखि फरक प्रतिभाका हुन्छन् ।

युगान्डाका ७ बर्षका बालक ग्राहम सेमा पनि त्यस्तै एक अद्भूत बालक हुन् जसले अहिलेसम्म तीन पटकसम्म प्रशिक्षार्थीको रुपमा विमान उडाइसके । उनको सपना भनेको मंगल ग्रहमा पुग्नु हो । रोयटर्सका अनुसार ग्राहममा विमानको विषयमा अथाह ज्ञान छ र उनीसँग सानै उमेरमा विमान उडाउनसक्ने क्षमता पनि छ ।

उनलाई युगान्डामा क्याप्टेन  उपमा दिइएको छ । स्थानीय संचारमाध्यमले उनीबारे समाचार छापेपछि यतिबेला उनी विश्वभर चर्चित बनेका छन् । युगान्डाका लागि जर्मन राजदूत तथा देशकै यातायातमन्त्रीले उनीसँग भेटिसकेका छन् । उनी गणित र विज्ञान विषयमा निकै अगाडि छन् । उनले सेस्ना १७२ विमान तीनपटक सफल रुपमा उडाइसकेको रोयटर्सले जनाएको छ ।

पाइलट र अन्तरिक्षयात्री बन्ने उनको लक्ष्य छ । स्पेस एक्स कम्पनीका मालिक एलन मस्कलाई प्रेरणाको स्रोत ठान्ने यी साना क्याप्टेनले मंगल ग्रहमा पुग्ने सपना रहेको बताउँछन् । उनी भन्छन् एलन मस्कसँग अन्तरिक्षबारे बुझ्न मन छ र उनीसँग मंगल ग्रहमा पुगेर हात मिलाउने मन छ । ३ वर्षको हुँदा एउटा हेलिकप्टर आफ्नी हजुरआमाको घरमा ठोक्किएर दुर्घटनामा परेको देखेपछि उनलाई विमान उडाउने रहर जागेको उनको भनाइ छ ।