माघ  ४ एजेन्सी ।। नायक शाहिद कपुरले आफ्नो फिल्मी करियरमा विभिन्न भूमिका निर्वाह गरेका छन् । कबिर सिंहदेखि पद्मावतका रतन सिंहसम्म, नायकले आफ्नो प्रस्तुतीले सबैलाई अत्यधिक प्रभावित पारेका छन् ।

अब खबरका अनुसार शाहिद कपुर एकपटक पुनः ठूलो प्रयोग गर्ने भएका छन् । उनले रंग दे बसन्ती निर्देशक राकेश ओमप्रकाश मेहरासँग हात मिलाएका छन् । खबरका अनुसार राकेश महाभारतका पात्र सूर्यपुत्र कर्णमाथि एक फिल्म बनाउन चाहन्छन् । उनी महाभारतको कहानी कर्णको दृष्टिकोणले बताउन चाहन्छन् । अब उक्त विशेष प्रोजेक्टका लागि उनले शाहिद कपुरसँग कुरा गरेका छन् ।

उनी शाहिद कपुरले उनको फिल्ममा कर्णको भूमिका निभाउन् भन्ने चाहेका छन् । एक समाचार पोर्टलका अनुसार यो राकेश ओमप्रकाशको एक ड्रीम प्रोजेक्ट हो र उनी लामो समयदेखि फिल्म बनाउन चाहन्थे । खबरका अनुसार निर्देशकले आफ्नो यो मेगा बजेट फिल्मका लागि निर्माता पाएका छन् । यस्तै शाहिदले पनि यो फिल्मका लागि स्विकारोक्ति दिइसकेका छन् । यस्तोमा वर्षको अन्त्यसम्म फिल्मको सुटिङ सुरु गरिने सम्भावना छ ।

शाहिद कपुर हाल आफ्नो फिल्म जर्सीका लागि सुटिङ गरिरहेका छन् । क्रिकेटरको जीवनमा बनिरहेको यो फिल्मका लागि शाहिदले निकै मिहिनेत गरिरहेका छन् । फिल्म यसैवर्ष रिलिज गरिने सम्भावना पनि छ ।

यस्तै पछिल्लो पटक शाहिदलाई फिल्म कबिर सिंहमा देखिएको थियो । त्यो फिल्म नायकको करियरको सबैभन्दा ठूलो ब्लकबस्टर साबित भयो र यसले उनको करियरलाई नयाँ दिशासमेत दियो ।